පසුගිය ජනාධිපතිවරණය සඳහා සංවිධාන කටයුතු සිදුකළ යුතු ආකාරය ගැන ජාතික ජන බලවේයේ නායක අනුර කුමාර දිසානායක මහතා එම පක්ෂ නියෝජිතයන් පිරිසකට උපදෙස් ලබාදෙන ආකාරය දැක්වෙන වීඩියෝවක් සමාජ මාධ්‍යවල හුවමාරු වනවා. එහිදී ඔහු පෙන්වා දෙන්නේ හිටපු ජනාධිපති මහින්ද රාජපක්ෂ මහතා සිය බහුතර ඡන්ද පදනම ගොඩනගාගෙන තිබුණේ ග්‍රාමීය මට්ටමෙන් බවත්, ජාතික ජන බලවේගයට ජනාධිපතිවරණයෙන් ජය ගැනීමට ඇති එකම මාර්ගය එම ග්‍රාමීය ජනතාව දිනාගැනීම බවයි. පහත පළවන්නේ එම වීඩියෝවේ අනුර කුමාර දිසානායක මහතා පළකළ අදහස්ය.
‘ගමේ බලය තිබුණේ මහින්ද ගාව. මහින්ද දේශපාලනයක් නෙවෙයි මහින්ද සංස්කෘතියක්. ඒ සංස්කෘතිය හොඳටම මැච් වුණේ කොතැනටද? ගමට. පරදින 2015 ජනාධිපතිවරණයේදිත් ගම දිනුවේ මහින්ද. විශේෂයෙන් යුද්ධෙන් පස්සේ. ඒක නිකම්ම ගොඩනැගුණු එකක් නෙවෙයි. එයා ගැන විශාල සාහිත්‍යයක් නිර්මාණය වුණා. රජ්ජුරුවෝ, ගීත, ප්‍රතාපත් බව කියලා හදලා හදලා ගෙනල්ලා අන්තිමට ජැක්සන් කිව්වා බුදුන්ගේ ඥාතියෙක් කියලා. එක ඉතිහාසඥයෙක් ඒක ප්‍රශ්න කළේ නෑ. ඇයි ඒ? වෙන්නත් පුළුවන්. ලේසි නෑ ඒක. ඒක ගොඩනැගපු එකක්. ප්‍රබන්ධයක්. ශාක්‍ය වංශය රුහුණට සම්බන්ධයක් තියෙනවා, මෙහෙමයි කියලා සම්බන්ධ කළා. අපේ රටේ සිංහල බෞද්ධ සංස්කෘතිය ඇතුළේ කාට හරි බුදුන් කිව්වොත් ඒක බුදුන්ට කරපු අපහාසයක්. ඒ නිසා බුදුන් කියන්න ගියේ නෑ. බුදුන්ගේ ඥාතියෙක් කිව්වා. එතැනට ගෙනාවා. මේ ඔක්කොම වැඩ කළේ ගමට. ඒ සංස්කෘතිය, ඒ ප්‍රබන්ධ ඉතා හොඳින් කළා. මම දන්නවා සාහිත්‍ය පොත් ලිව්වා, කවි ලිව්වා,සින්දු ලිව්වා. චිත්‍රපටයක් හැදුවා දුටුගැමුණු කියලා ලංකාවේ ඉන්න හොඳම අධ්‍යක්ෂවරයෙක්. දුටුගැමුණුගේ කූටප්‍රාප්තිය ඒක. මොකද වුණේ ෆිල්ම් එක එළියට එනකොට මහින්ද පැරැදුණා. ෆිල්ම් එක දිව්වේ නෑ. දුටුගැමුණු ගිහින් හිටියේ. බැරි වෙලාවත් මහින්ද රාජපක්ෂ ඉන්න වෙලාවේ දුටුගැමුණු ෆිල්ම් එක රිලීස් වුණා නම් ඒක වෙන ටේ‍රන්ඩ් එකක් හදනවා. මම මේ අපහාසයක් නෙවෙයි කියන්නේ. එයා සංස්කෘතියක්. එයා දේශපාලකයෙක් නෙවෙයි. ඒ සංස්කෘතිය හොඳටම මැච් වුණේ ගමට. ඒ නිසා අපි මොනවා උඩින් කතා කළත් ගම තිබුණේ මහින්ද රාජපක්ෂට. ගම වැටුණේ දැන්. දැන් තමයි ගම කැඩුණේ. ඒ නිසා දැන් තමයි අපිට ගම ආමන්ත්‍රණය කරන්න පුළුවන් අවස්ථාව තියෙන්නේ.
විශ්වවිද්‍යාල ආචාර්යවරු හාරදාස් ගානක්නේ ඉන්නේ. ලෝයර්ස්ලා 19,000යි. දොස්තරලා 21,000ක් වගේ ඉන්නේ. මේ ඔක්කොම එකතු කළත් ලක්ෂයක් නෑනේ. නමුත් මිලියන ගණන් ඡන්ද තියෙන්නේ ගම්වල. ඒ නිසා ගම අතේ තමයි මේ වැඩේ තියෙන්නේ. ඒ නිසා ගම සංවිධානය කරන එක, ඒකේ එන්.පී.පී. සභාව හදන එක, නව නායකත්වයක් ගොඩනගන එක තමයි අපේ බලය ගන්නවා නම් ගතහැකි පාර හැටියට තියෙන්නේ. ඒක ඉලක්ක කරගෙන තමයි අපි වැඩ කරන්නේ. අපි හිතනවා මේ සැරේ ගේම ගහන්න ඕනෙම කියලා තමයි යන්නේ නම්.’
අන්තර්ජාලය ඇසුරෙනි
