පසුගිය වසරේ පැවති විනිසුරු විභාගයේ ප්‍රශ්න පත්‍ර පිටවී ඇති බවට ශ්‍රී ලංකා ක්‍රිකට් විනිසුරු කමිටුව විසින් ශ්‍රී ලංකා මානව හිමිකම් කොමිෂන් සභාවට පැමිණිල්ලක් ඉදිරිපත් කර තිබේ.
ශ්‍රී ලංකා ක්‍රිකට් ආයතනයේ සිව්වැනි ශ්‍රේණියේ විනිසුරුවරයකු වන චන්දන කන්නන්ගර ශ්‍රී ලංකා මානව හිමිකම් කවුන්සිලය වෙත පැමිණිල්ලක් ඉදිරිපත් කිරීමෙන් අනතුරුව මාධ්‍ය වෙත ප්‍රකාශ කළේ ශ්‍රී ලංකා ක්‍රිකට් ආයතනය පසුගිය වසරේ සිව්වැනි ශ්‍රේණියේ විනිසුරුවන් තුන්වැනි ශ්‍රේණිය දක්වා උසස් කිරීමට පැවැත්වූ විභාගයට අපේක්ෂකයන් 100කට අධික සංඛ්‍යාවක් ඉදිරිපත් වූ බවයි.
හිටපු ටෙස්ට් ක්‍රිකට් විනිසුරුවරයකු සහ ශ්‍රී ලංකා ක්‍රිකට් විනිසුරුවරුන්ගේ කමිටු සාමාජිකයකු වන දෙදෙනෙකු විභාගයට සතියකට පෙර විනිසුරුවරුන් කිහිප දෙනෙකුට ප්‍රශ්න 60 කින් යුත් ප්‍රශ්න පත්‍රයක් පිටකර ඇති බවට කන්නන්ගර චෝදනා කළේය.
ඔහු කියා සිටියේ එම පිට කරන ලද ප්‍රශ්න පත්‍රයෙන් ප්‍රශ්න 25ක් නිල විභාගයට ඇතුළත් කර තිබූ බවයි.
“ඒ දෙන්නම ප්‍රශ්න පත්‍රය ලීක් කළා. විභාගයෙන් පසු විනිසුරුවරුන් විසිපස් දෙනකුට උසස්වීම් ලැබුණා. කෙසේවෙතත් ලකුණු 98ට වඩා ලබා ගත් අයදුම්කරුවන් 30කට වැඩි ප්‍රමාණයක් සිටියත් සමහර අය සුදුසුකම් ලබා ගැනීමට අසමත් වුණා. ශ්‍රී ලංකා ක්‍රිකට් නිසි ක්‍රියා පටිපාටිවලින් සුදුසුකම් ලත් විනිසුරුවන් තෝරාගත යුතුයි. මේ අසාධාරණය ගැන විවිධ ආයතනවලට පැමිණිලි කරන්න අපි තීරණය කළා,” යයි ඔහු ප්‍රකාශ කළේය.
පසුගිය වසරේ අප්‍රේල් 23 වැනිදා පැවති විභාගයේ ප්‍රතිඵල නිකුත් කිරීමට පෙබරවාරි 4 වැනිදා දක්වා මාස අටක ප්‍රමාදයක් සිදු වූ බව ද ඔහු කීවේය.
අවම වශයෙන් අයදුම්කරුවන් 25 දෙනකුට පිටවූ විභාග ප්‍රශ්න පත්‍රය ලැබී ඇති බව අධ්‍යක්ෂ මණ්ඩලය දැන සිටියත් ඒ සම්බන්ධයෙන් පියවර ගැනීමට ඔවුන් අපොහොසත් වූ බව ද කන්නන්ගර කියා සිටියේය.
ප්‍රශ්න පත්‍රයක් පිටවූ පළමු අවස්ථාව මෙය නොවන බව පෙන්වා දුන් ඔහු මීට පෙර එලෙස ප්‍රශ්න පත්‍ර ලැබී තිබුණේ පුද්ගලයන් කිහිප දෙනෙකුට පමණක් බව සඳහන් කළේය.
කෙසේවෙතත්, මෙවර අවම වශයෙන් අයදුම්කරුවන් 25 දෙනෙකුට විභාගයට පෙර ප්‍රශ්න පත්‍රය ලැබී ඇතැයි පැවසේ.
කන්නන්ගර කියා සිටියේ ප්‍රශ්න පත්‍රය කලින් ලැබීමකින් තොරව කිසිවකුට, කුමාර් ධර්මසේනට පවා එම ප්‍රශ්න පත්‍රයට ලකුණු 98ක් ලබා ගැනීමට නොහැකි තරම් බවයි.
