නිදහස් සහ සාධාරණ මැතිවරණයක් නොපවත්වන්නේ නම් පාකිස්තානය අස්ථාවර වනු ඇතැයි සිරගත වී සිටින හිටපු අගමැති ඉම්රාන් ඛාන් ප්රකාශ කළ බව විදෙස් මාධ්ය වාර්තා කළේය. ඉම්රාන් ඛාන්ගේ ටෙහ්රීකි ඉන්සාෆ් පක්ෂය ලබන මස 8 වැනිදා පැවැත්වෙන මහ මැතිවරණයට දැනටමත් සූදානමින් පසුවන අතර, සාධාරණ මැතිවරණයක් අපේක්ෂා කරන සෙසු ප්රතිවාදී පක්ෂ සමඟ සහයෝගයෙන් කටයුතු කිරීමට තීරණය කර ඇතැයි වාර්තා වේ. ඉම්රාන්ගේ පක්ෂයේ මැතිවරණ ලකුණ වන ක්රිකට් පිත්ත ප්රතික්ෂේප කිරීමට පසුගියදා පාකිස්තාන මැතිවරණ කොමිසම පියවර ගත් බැවින් ඡන්දය පැවැත්වීමේ සාධාරණත්වය සියලු දේශපාලන පක්ෂවලට එක හා සමාන නැති බවට චෝදනා එල්ල කර තිබේ.
71 හැවිරිදි ඉම්රාන් ඛාන් පසුගියදා බන්ධනාගාරයේ සිට මාධ්ය සංවාදයකට සහභාගි වෙමින් ප්රකාශ කර ඇත්තේ මහ මැතිවරණය සාධාරණයකින් තොරව පැවැත්වීමෙන් පාකිස්තානය තවදුරටත් අස්ථාවර හා අවිනිශ්චිත රටක් බවට පත් වනු ඇති බවය.