එම මිතුරාගෙන් නිවසේ ඉදිරි දිනයකදී කොටහලු මංගල්‍යයක් පැවැත්වීමට නියමිත අතර, නිවෙස අලුත්වැඩියා කරන්නේ ඒ වෙනුවෙනුයි.
පියල් නිවසට එද්දි දොර ජනෙල් සියල්ල වසා තිබුණා. ඔහු සෙමින් මුලුතැන්ගෙය පැත්තට යන්නේ බිරිඳ කුමක් කරන්නේද යන්න දැන ගන්නයි.
ඇය දරුවාත් සමඟ නිදාගන්නේ මුලුතැන්ගෙයි සිට දෙවැනියට ඇති කාමරයේ යි. එහි ජනේලය අසළට ගිය පියල්ට ඇය දුරකතන සංවාදයක බව තේරුණා.
ඒ බව ගණනකට නොගත් ඔහු මුලුතැන්ගෙයි දෙසින් නිවසට ඇතුළු වූයේ එහි දොර අගුලු ලා නොතිබුණු නිසයි.
එහි විදුලි බල්බය අක්‍රිය බව ඔහු දැන සිටියා. එයට අලුත් විදුලි බුබුළක් සවි කිරීමට සිතු ඔහු සිය බිරියට අඬ ගසා විදුලි පන්දම රැගෙන එන ලෙස පැවසුවා.
ඒ කීමට සාර්ථක ප්‍රතිචාර දැක්වූ ඇය විදුලි පන්දම ද රැගෙන මුලුතැන්ගෙට පැමිණියා.
"මේ ඔයා අර කවුරු එක්කද ෆෝන් එකෙන් කතා කර කර හිටියේ.."ඔහු මේ පැනය ඇසුවේ වැඩි ගණනකට නොගෙනයි. එහෙත් ලැබුණු පිළිතුර නම් සුන්දර වූයේ නැහැ.
"ඔයාට මම කියලනේ තියෙන්නේ මම ලබන මාසේ ඔයාගෙන් දික්කසාද වෙන්න නඩු දානවා. මම කතා කර කර හිටියේ කවුරු එක්ක ද කියලා කියන්න ඕනි නෑනේ.."ඇගේ වචනවලට පියල්ගේ හිත රිදුම් දෙන්නට ඇති. එහෙත් ඒ රිදුම් පරදවා ඔහුගේ සිතට දැඩි කෝපයක් පැමිණියා.
ඒ සමඟම ඔහුගේ දෑස් යැවෙන්නේ මේසය වෙතයි. එහි වූ පිහිය අතට ගන්නා පියල් ඉන් ඇගේ මුහුණට පහරක් එල්ල කළා.
"අම්මෝ.. මෙන්න මිනී මරණවෝ.." ලෙසින් කෑ ගසාගෙන ඇය දොරෙන් එළියට පැන වැසිකිළියට දෙසට දිව්වා.
ඇයට එලෙස වැඩි දුර යන්නට හැකි වූයේ නැහැ. ඇය ජල කරාමය අසළ ඇද වැටුණා. එතැන් සිට ඇය අධාර ඉල්ලා කෑ ගසන්නට වුණා. මේ අතර පියල්ගේ දෑස දිව්වේ කිතුල් පොල්ලක් දෙසට යි. එය අතට ගන්නා පියල් ඇයට පහර පිට පහර එල්ල කළා.
මේ හඬ ඇසුන ඇගේ මව තිගැස්සී නින්දෙන් ඇහැරුණා. ඇය දියණිය කෑ ගසන ස්ථානයට වහා දිව එන්නේ සිදුවන්නේ කුමක් දැයි අදහාගත නොහැකිවයි.
"උඹත් මේවට හවුල්.. මගේ ගෑනිගේ හොර මඟුල්වලට උඹ තමයි උඩගෙඩි දෙන්නේ.." ලෙසින් පැවසූ ඔහු කිතුල් පොල්ලෙන් ඇගේ දෙපාවලටත් පහර දුන්නා.විනාඩි කිහිපයක් තිස්සේ තිබූ කලබගෑනිය එසේ අවසන් වුණා.
පසුගිය 10 වැනිදා උදේ හත පසුවී විනාඩි කිහිපයක් ගත වෙද්දි මාලිම්බට පොලිසියේ දුරකතනයට පණිවුඩයක් ලැබුණා.
අනතුරුව පොලිසිය එහි ළඟා වුණා. කාන්තාවක් පැවසුවේ බෑනා කළ පහර දීම් නිසා තුවාල ලැබූ බවයි.
ඇගේ දියණිය ජල කරාමය අසළ වැටී සිටියා. ඇය මියගොස් සෑහෙන වෙලාවක් බව සිරුර දුටු විට පැහැදිලි වුණා.
1990 ගිලන් රථය කැඳවා තුවාලකාරිය රෝහල් ගත කිරීමට කටයුතු කළ අතර එහිදී ඇය සියල්ල හෙළි කළා.
"මගේ බෑනා තමයි මේක කළේ. එයා මේ පැත්තේ නෙවෙයි. මොරවක. කපුවෙක් මාර්ගෙන් කතා කරලා තමයි මගේ දුව එක්ක එයා විවාහ වුණේ. එයා දැන් ඉන්නේ ආමි එකෙන් පැනලා. කුලී වැඩ තමයි කරන්නේ. කොයි වෙලේත් දුවත් එක්ක රණ්ඩු. දුවට හරියට ගහනවා.."
"මම මෙයාව බැන්ඳේ ප්‍රොපොසල් එකකින්. 2016 දී.. එතකොට මම ආමි එකේ. මම එයාව බැඳලා එයාගේ ගෙදරම පදිංචි වුණා. අපි දෙන්නා හොඳින් පවුල් ජීවිතේ ගෙව්වා. අපිට පුතෙක් ලැබුණා. එයාට අවුරුදු හතරයි.."
"මම කෑම්ප් එකේ ඉඳලා නිවාඩුවට ගෙදර එන්නේ මාසෙකට සැරයක් වගේ තමයි. මට පඩිය ලැබෙන්නේ රුපියල් තිස්පන්දාහයි. ඒකෙන් විසි හත්දාහක්ම මම එයාට එවනවා. මුල් කාලේදී හොඳට හිටියට පස්සේ ඒ සල්ලි මදි කියලා නිතරම මට කියනවා. මේක ඉවසගෙන ඉන්න බැරි වෙද්දි තමයි මම 2018 දී ආමි එකෙන් පැනලා ආවේ.."
"ඒ ඇවිත් මම කුලී වැඩ කරන්න පටන් ගත්තා. ටික දවසක් යද්දි මට මේසන් වැඩත් පුළුවන් වුණා. මෙහෙම ඉන්දෙද්දි මෙයා දම්පැල්ල පැත්තේ කොල්ලෙක් එක්ක යාලුවෙලා කියලා මට ආරංචියක් ආවා. පස්සෙ අපි විරසක වුණා. එයා නිතරම වගේ මාව ප්‍රතික්ෂේප කළා. මගේ ළඟ දාඩිය ගඳයි කියලා මට ළඟට එන්න දෙන්නෙත් නෑ. මේ ප්‍රශ්න දුර දිග ගියා. හැබැයි පස්සේ එයා ඒ සම්බන්ධය නතර කළා. නමුත් අපි අතර තිබුණ විරසක ගතිය එහෙමම තිබුණා. ඔය අතර තමයි මෙයා නුවර පැත්තේ කොල්ලෙක් එක්ක යාලුවෙලා කියලා මට ආරංචි වුණේ.."ඔහු පවසන පරිදි මේ නුවර කොල්ලා මිලිම්බඩට එන්නේ ටිපර් රථ රියදුරෙකු ලෙසිනුයි.
ඇගේ නිවස අසළ පිහිටි ඇගේ සහෝදරියට අයත් ඉඩමේ පස් පිරවීමේ කොන්ත්‍රාත්තුව ලබාගෙන තිබුණේ මේ තරුණයා විසින්. ඇය මොහු සමඟ හිතවත්කමක් ඇති කරගන්නේ දෙවැනි වරටත් සැමියාට පිටුපාමින්.
"එයා ආයෙත් කොල්ලෙක් එක්ක යාලුවෙලා කියලා දැනගත්තම මට ඉහිලුම් නැතුව ගියා. මම උදේට වැඩට ගියාම එන්නේ රෑ වෙලා. එයත් වැඩට යනවා. ගිහින් මොනා කරනවද මම දන් නෑ.."
"මේ සම්බන්ධය පටන් ගත්තට පස්සේ එයා මාව ගණන් ගත්තෙම නෑ. ඒ ගැන ඇහුවම කිව්වා මාව දික්කසාද කරනවා කියලා. එයා දිගටම ඒක කිව්වා. මේ දෙසැම්බර් මාසේ නඩු දානවා කියලා. ඒක නිසා එයා ගැන හොයන් නැතුව ඉන්න කියලා.."
"එදා නමවැනිදා ගෙදර එද්දි වෙලාව දහායහමාර විතර වුණා. ගෙයි දොරවල් වහලා නිසා පිටිපස්සෙන් ගිහින් බලද්දි එයා කාමරේට වෙලා අර කොල්ලත් එක්ක ෆෝන් එකෙන් කතා කරනවා. ඇහුණෙ නෑ වගේ මම කුස්සියට ගිහින් එයාට ටෝච් එක අරගෙන එන්න කිව්වා. බල්බ් එක මාරු කරන්න.. ඉවසගෙන ඉන්න බැරි තැන මම කෝල් එක ගැන ඇහුවා. එයා ඒ වෙලාවේ කිව්වා, මම කොහොමත් දික්කසාද වෙන්න ඉන්නේ දෙසැම්බර්වලදී එයාව බඳිනවා, ඒක නිසා ඒවා ගැන අහන්න එපා කියලා. තමන්ගේ පවුල මේ වගේ කතාවක් කිව්වම ඉවසගෙන ඉන්න පුළුවන් කාටද සර්..?"
"අම්මටයි දුවටයි දෙන්නටම ගහලා මම ගෙට ගිහින් ටික වෙලාවක් හිටියා. දරුවා හොඳටම නිදි.. එයා මේ කිසි දෙයක් දන් නෑ. මම පාන්දර එකහාමරට විතර දරුවත් වඩාගෙන ගෙයින් පිටවෙලා ත්දූවේ නෑ ගෙදරකට ගිහින් ඉඳලා පස්සේ ත්‍රීවිල් එකක් ගෙන්නගෙන මොරවක අපේ ගෙදරට ගිහින් හිටියා. පස්සේ තමයි මොරවක පොලිසියට ගිහින් භාර වුණේ.."
ඔහු එලෙස සියල්ල හෙළි කළ අතර අසල්වැසියන් පැවසුවේත් සැකකාර සැමියා කාගෙත් හොඳ හිත දිනා සිටි අයෙකු බවයි.
එලෙසම දරුවාට බෙහෙවින් ආදරය කළ ඔහු නිවසේ සිටින බොහෝ අවස්ථාවල දරුවා සමඟ ආදරෙන් කල් ගෙවූ බවද ඔවුන් පැවසුවා.
ඇගේ පවුලේ අයනම් කියන්නේ ඔහු ඇයට නිතර අඩම්තේට්ටම් කළ බවයි, මේ නිසාම ආරවුල් ද හටගත් බව ඔවුන් කියනවා.
මෙලෙස ඝාතනය වූයේ අවුරුදු 33ක් වයස හර්ෂා කළුආරච්චි නම් ඇඟලුම් සේවිකාවක්.
තක්ෂිලා ජයසේකර විසින් "මාංචු" පුවත්පතට ලියූ ලිපියක් ඇසුරිනි.
