යොවුන් වියේ මෙම ජෝඩුව කළුතර බෝධිරාජයාණන් අසල බස්නැවතුමේ සිට අම්බලන්ගොඩ දක්වා ධාවනය වෙමින් තිබූ ඉන්ටර් සිටි බසයට ගොඩවිය. පෙම්වතිය බසයට නැගීමට අදිමදි කළද පෙම්වතා දොරටුවට
ගොඩවී එහි හිස් ආසන ඇති බව දැකීමෙන් ඇයද බසයට නග්ගවා ගත්තේය.
සැප බස්රියේ දෙදෙනාට එක ළඟ වාඩිවී යාමට ආසන දෙකක් නැති බව පෙම්වතිය දුටුවාය. ඇය පෙම්වතාගේ පපුවට හෙමිහිට ගහගෙන ගහගෙන ගියාය. කොන්දොස්තර පසුපසට ගොස් වාඩි වෙන්නැයි කීවද පෙම්වතිය නොසෙල්වී ආඩපාලි කියමින් සිටියාය.
“බූරුවා... ඇයි බූරුවෝ කෝ සීට්...” ඇය උරණව ඔහුට දොස් නගන්නට විය. ලැජ්ජාවට පත් තරුණයා පසුපස අසුනේ වාඩිවන ලෙස ඇයට කීය. එහි ඉඩකඩක් තිබූ අතර තරුණයින් තිදෙනෙක් වාඩිවී සිටිනු පෙනුණි. ඇය පෙම්වතා දෙස හැරී කමක් නැද්ද?’යි විමසූ විට ‘මට කමක් නැහැ’යි කියමින් තරුණයා වෙනත් අසුනක වාඩිවිය. මෙම බසය අහුන්ගල්ලට එන තුරුම පෙම්වතාටත් පෙම්වතියටත් එකළඟ ආසන දෙකක වාඩිවීමට වාසනාව නොලැබුණි.
- lankadeepa
