ඊයේ (25) රාත්‍රී කටුනායක පොලිසියේ රථ වාහන අංශයේ නිලධාරීන් දෙදෙනෙකු විසින් මෙම
තරුණියව බේරාගෙන ඇති අතර පසුව ඇයව අත්අඩංගුවට ගැණුනා.
ඊයේ රාත්‍රියේ මුර සංචාර රාජකාරියේ නියැලී සිටි පොලිස් සැරයන් පෙරේරා සහ ඔහුගේ සහායක පොලිස් කොස්තාපල් ගයාන් සැක කටයුතු ලෙස දුම්රිය මාර්ගය දිගේ ගමන් ගන්නා තරුණියක් පිළිබඳව නිරීක්ෂණය කර තිබෙනවා.
ඒ අනුව වහා ක්‍රියාත්මක වූ මෙම පොලිස් නිලධාරීන් දෙදෙනා අදාළ ස්ථානයට යන විටත්, මෙම තරුණිය දුම්රිය මාර්ගය දිගේ ඉදිරියට ගමන් කරමින් සිට තිබෙනවා.
ඒ වනවිට කොළඹ සිට හලාවත දක්වා ධාවනය වන රාත්‍රී කාර්යාල දුම්රිය පැමිණෙමින් තිබී ඇති අතර මෙම තරුණිය ඒ වනවිටත් දුම්රියට අතිශය සමීප වී සිට තිබෙනවා.
පොලිස් නිලධාරීන් දෙදෙනා ඇයට නොදැනෙන ලෙස වෙනත් මාර්ගයකින් ඇය ගමන් ගත් මාර්ගයට පිවිස විදුලි පන්දමක් ආධාරයෙන් දුම්රියේ වේගය අඩාල කරන ලෙස දුම්රිය රියදුරුට සංඥා කර තිබෙනවා.
ඉන් පසුව මෙම පොලිස් නිලධාරීන් දෙදෙනා අදාළ තරුණිය වෙත පැන දුම්රිය මාර්ගයෙන් පිටතට ඇයව තල්ලු කරමින් වැටී තිබෙනවා.
ඒත් සමගම දුම්රිය ඔවුන් තිදෙනාව පසුකරමින් ගමන් කර තිබුණා. කෙසේවෙතත් දුම්රිය රියදුරා සිතා ඇත්තේ පොලිස් නිලධාරීන් දෙදෙනා දුම්රියේ ගැටෙන්නට ඇති බවයි. ඒ අනුව මද දුරක් ගොස් දුම්රිය නතර කර ගැනීමට දුම්රිය රියදුරුට හැකි වී තිබෙනවා.
අදාළ තරුණිය කළක් විදේශගතව සිට, දැනට කටුනායක ඇගලුම් කම්හලක සේවය කරන පොළොන්නරුව ප්‍රදේශයේ පදිංචි 29 හැවිරිදි තරුණියක් වනවා. ඇය කටුනායක කෝවින්න ප්‍රදේශයේ නවාතැන් ගෙන සිටින්නියක් බවත් පොලිසිය සිදු කළ මූලික පරීක්ෂණවලදී අනාවරණය කරගෙන තිබෙනවා.
Posted in: slide
