කෙහෙල්බද්දර පද්මේ, කොමන්ඩෝ සලින්ත හා කුඩු නිලංග නම් අපරාධකරුවන් ඉන්දුනීසියාවේ ජකර්තා නුවර සැඟවී සිටින බවට පොලිසියට විශ්වාසදායී තොරතුරක් පසුගිය දා ලැබී තිබුනි.
ඒ අනුව අදාළ පිරිස අත්අඩංගුවට ගැනීමට රහසිගත මෙහෙයුමක් ක්‍රියාත්මක කරනු ලබන්නේ පොලිස්පති ප්‍රියන්ත වීරසූරිය මහතාගේ සෘජු අධීක්ෂණයෙනි.
මෙම විශේෂ ක්‍රියාන්විතය සඳහා දක්ෂ සහකාර පොළිස් අධිකාරීවරුන් දෙදෙනෙකු වන රොහාන් ඕලුගල සහ මහින්ද ජයසුන්දර යන නිළධාරීන් මීට දින 7කට පෙර ඉන්දුනීසියාව වෙත පිටත්කර හැර තිබේ.
පසුව එම නිළධාරීන් එරට පොලීසිය සමඟ එක්ව දින ගණනාවක් ආවේක්ශන රාජකාරිවල නිරතව තිබේ. එම නිළධාරීන් දෙදෙනා මෙම දින 7 තුළ දිනකට එක් වේලක් පමනක් ආහාර ලබාගනිමින් පදික වේදිකාවන් මත පවා නිදාගනිමින් ඉතා දුෂ්කර මෙහෙයුමක් සිදුකර ඇති බව පොලිස් ආරංචි මාර්ග පවසයි.
මේ අතර පොලීසිය තමන් ලුහු බඳින බවට ඉව වැටුනු මෙම අපරාධ කල්ලිය ඉන්දුනීසියාවේ ජකර්තා නුවර රැඳී සිටි අධි සුඛෝපභෝගී නිවාස සංකීර්ණයෙන් ඉවත් වී වෙනත් ස්ථානයක් සඳහා ගොස් ඇති බව වාර්තා වෙයි.
පසුව එම කණ්ඩායම එම ස්ථානයට කිලෝමීටර් 7කට ඔබ්බෙන් වූ වෙනත් සුඛෝපභෝගී නිවාස සංකීර්නයක් වෙත ගොස් ඇති නමුත් ඒ සඳහා කිලෝමීටර් 60කට අධික දුරක් ගෙවා විකල්ප මාර්ග භාවිතා කර ඇති බවද සඳහන්.
කෙසේවෙතත් එම ස්ථානයද අනාවරනය කරගත් නිළධාරීන් දෙදෙනා එරට විශේෂ පොලිස් කණ්ඩායමක් සමගින් එක්ව අද අළුයම එම ස්ථානයද වටලා තිබේ.
එහිදී අදාල කණ්ඩායම පොලිසිය විසින් අත්අඩංගුවට ගෙන ඇති අතර එම අවස්ථාවේදී පලා යෑම සඳහා එරට මුදලින් මිලියන 10ක් එම ස්ථානයේදීම ලබාදීමට යෝජනා කර තිබේ.
එම යෝජනාව ප්‍රතික්ශේප කර ඇති නිළධාරීන් ඔවුන් එරට පොලීසියට රැගෙන යෑමට කටයුතු කර තිබුනි.
