කෑගල්ල, බුළුරුප්ප, කෙම්පිටිය වලව්වේ හිමිකරු නිදි ඇඳේදී ම අත් ගැට ගසා ඇඳ සිටි සරම ගලවා ගෙල සිර කර ඝාතනය කොට තිබියදී ඊයේ (ඔක්. 28) පෙරවරුවේ සොයා ගත් බව කෑගල්ල පොලිසිය පැවසීය.
මෙලෙස ඝාතනයට ලක්ව ඇත්තේ, කෑගල්ල, හෙට්ටිමුල්ල, බුළුරුප්ප, කෙම්පිටිය වලව්වේ පදිංචිව සිටි ක්‍රිෂාන්ත පුලස්ති මාරපන නමැති 75 හැවිරිදි දෙදරු පියෙකි.
ඝාතනයට ලක්ව ඇති දෙදරු පියා එකොළොස් දෙනකුගෙන් යුත් පවුලක වැඩිමහල් සහෝදරයා බව ත් ඔහුගේ එක ම පිරිමි දරුවා ඔස්ට්‍රේලියාවේ පදිංචිව සිටින බව ත් එක ම දියණිය කලකට ඉහතදී මිය ගොස් ඇති බව ත් පොලිසිය පැවසීය.
ඝාතනයට ලක්ව ඇති ඔහු කෑගල්ල හෙට්ටිමුල්ල, බණ්ඩාරනායක විද්‍යාලය, කෑගල්ල ශාන්ත ජෝශප් බාලිකා විද්‍යාලයේ ගණිත ගුරුවරයෙකු ලෙස සේවය කොට විශ්‍රාම ලබා ඇති බව ත් ශ්‍රී ලංකා පොදු ජන පෙරමුණ නියෝජනය කරමින් කෑගල්ල ප්‍රාදේශීය සභා මන්ත්‍රීවරයෙකු ලෙස වැටුපක් නොගෙන සේවය කර ඇති බව ත් පොලිසිය පැවසීය.
ඝාතනයට ලක්ව ඇති මෙම පුද්ගලයා එක්තැන්ව සිටින වයෝවෘද්ධ බිරිය සමග නිවසේ පදිංචිව සිට ඇති බව ත් අසල්වැසියෙකු වන මහගම ආරච්චිගේ තිලකරත්න නමැත්තෙකු කලක සිට නිවසේ රාජකාරි කටයුතු මෙන් ම මුර කටයුතු ද සිදු කරමින් සිට ඇති බව ත් පොලිසිය පැවසීය.
ඔහු දින කිහිපයකට ඉහතදී වලව්වේ කුඹුරුවලට බිත්තර වී රැගෙන ඒමට පොළොන්නරුව ප්‍රදේශයට ගොස් ඇති බව පොලිසිය පැවසීය.
ඊයේ පෙරවරු 7:30ට පමණ ආණමඩුව ප්‍රදේශයේ ලොරි රථයක් වී මිලට ගැනීමට කෙම්පිටිය වලව්වට පැමිණීම නිසා පෙරවරු 8ට පමණ නිවසේ රාජකාරි කටයුතු කරන මුරකරුගේ පිරිමි දරුවා ද වලව්වට පැමිණ වයෝවෘද්ධ යුවළට කතා කොට තිබේ.
ශබ්දයක් නොමැති තැන ඇර දමා තිබුණු වලව්වේ ප්‍රධාන ෙදාරටුවෙන් ඇතුළතට ගොස් බලන අවස්ථාවේදී එක් ඇඳක ගෙහිමියාගේ කටේ ප්ලාස්ටර් ගසා අත් දෙක බැඳ ඇඳ සිටි සරම ගලවා ගෙල සිර කර ඇති අයුරු දැක තිබේ.
එක්තැන්ව සිටි ගෙහිමි කාන්තාවට පහර දී ඇය බිමට වැටී සිටින අයුරු දැක ඝාතනයට ලක්ව ඇති දෙදරු පියාගේ සහෝදර සහෝදරියන්ට දන්වා ඔවුන් විසින් කෑගල්ල මූලස්ථාන පොලිසියට දන්වා තිබුණු බව පොලිසිය පැවසීය.
පසුව පොලිස් කණ්ඩායමක් නිවසට ගොස් විමර්ශන කටයුතු ආරම්භ කිරීමේදී අනාවරණය වී ඇත්තේ, යම් පිරිසක් හෝ පුද්ගලයෙක් නිවසට පැමිණ විදුලි මීටරය විසන්ධි කර නිවසට රිංගා නිවස ඇතුළත බඩු මුට්ටු පෙරළා දේපොළ සොයා ඇති බව පොලිසිය පැවසීය.
පසුව වයෝවෘද්ධ යුවළ සිටි කාමරයට ගොස් ගෙහිමියාගේ අත් දෙක ගැට ගසා කටට ප්ලාස්ටර් ගසා ඇඳ සිටි සරම ගලවා ගෙල සිර කර ඝාතනය කොට ඇති බව ත් එක්තැන්ව සිටි වයෝවෘද්ධ කාන්තාවගේ කටට ප්ලාස්ටර් ගසා පහර දී කාමරයේ දමා නිවසේ සවි කර තිබුණු සී.සී.ටී.වී. කැමරා පද්ධතියේ රෙකෝඩරයත් රැගෙන නිවසේ පිටත තිබුණු මෝටර් රථය රැගෙන පළා ගොස් ඇති බව ත් පොලිසිය පැවසීය.
නිවසේ එක්තැන්ව සිටි වයෝවෘද්ධ කාන්තාව පසුව ඥාතීන් විසින් කෑගල්ල මහ රෝහලට ඇතුළත් කිරීමට කටයුතු සිදු කෙරිණි.
මෝටර් රථය කෑගල්ල අවිස්සාවේල්ල මාර්ගයේ පිංදෙණිය පොලිස් වසමේ දමා ගොස් තිබියදී පිංදෙණිය පොලිසියේ නිලධාරීන් විසින් පොලිස් භාරයට ගෙන තිබුණු බව කෑගල්ල පොලිසිය පැවසීය.
පසුව කෑගල්ල මහ රෝහලේ විශේෂඥ අධිකරණ වෛද්‍ය නිලධාරි වෛද්‍ය රුචිර නදීර මහතා සහ අධිකරණ වෛද්‍ය නිලධාරිනී නිරංජලා කුලතුංග මහත්මිය ද අදාළ නිවසට ගොස් දේහය සම්බන්ධයෙන් පරීක්ෂණයක් ද සිදු කෙරිණි.
ඝාතනය සම්බන්ධයෙන් කෑගල්ල පොලිසිය කෑගල්ල මහේස්ත්‍රාත් අධිකරණයට කරුණු වාර්තා කිරීමෙන් පසුව කෑගල්ල වැඩබලන මහේස්ත්‍රාත් මැල්කම් මචාඩෝ අදාළ නිවසට ගොස් මහෙස්ත්‍රාත් පරීක්ෂණය සිදු කළේ ය.
දේහය කෑගල්ල මහ රෝහලේ විශේෂඥ අධිකරණ වෛද්‍ය නිලධාරි වෛද්‍ය රුචිර නදීර මහතා වෙත භාර දී පශ්චාත් මරණ පරීක්ෂණයක් පවත්වා සැකකරුවන් අත්ඩංගුවට ගෙන අධිකරණයට ඉදිරිපත් කරන ලෙසත් නියෝග කෙරිණි.
කෑගල්ල කොට්ඨාස භාර ජ්‍යෙෂ්ඨ පොලිස් අධිකාරි වයි.එල්. ලීලවංශ, පොලිස් අධිකාරි චන්දන කන්දේවත්ත නිලධාරීන්ගේ සෘජු අධීක්ෂණය යටතේ කෑගල්ල මූලස්ථාන පොලිසියේ ස්ථානාධිපති ප්‍රධාන පොලිස් පරීක්ෂක නාලක මාගෙදරගම මහතාගේ උපදෙස් පරිදි අපරාධ විමර්ශන අංශයේ ස්ථානාධිපති පොලිස් පරීක්ෂක පුෂ්ප කුමාර රණසිංහ, උප පොලිස් පරීක්ෂක ලාල් ප්‍රියන්ත, පොලිස් සැරයන්වරුන් වන මාරසිංහ (48683), පොලිස් කොස්තාපල්වරුන් වන බණ්ඩාර (78617), නවරත්න (79840), චානක (90427) කෑගල්ල කොට්ඨාස අපරාධ ස්ථාන පරීක්ෂණාගාරයේ ස්ථානාධිපති ප්‍රධාන පොලිස් පරීක්ෂක තිවංක දෙහිමඩුගේ, පොලිස් සැරයන් වසන්ත (34165) ඇතුළු නිලධාරීහු විමර්ශන කටයුතු සිදු කළහ.
චමින්ද ජයලත් – දමුණුපොළ
