වවුනියාවේ තෝනිකල් ප්‍රදේශයේ උපන් දින සාදයක් පැවැත්වෙමින් තිබූ පැන යුවලක් මරා දැමීමේ සිද්ධියක් සම්බන්ධයෙන් වසරක් පුරා බන්ධනාගාරයේ සිටින සැකකරුවන් හත් දෙනාට ඇප ලබා දීම වවුනියාව මහාධිකරණ විනිසුරු එම්.ඉලන්චෙලියන් විසින් පෙරේදා ( 25) ප්‍රතික්ෂේප කරනු ලැබීය.
සිද්ධිය වූ නිවසේ 2023-07-23 දින උපන් දින සාදයක් පැවති අතර ඊට සහභාගී වී සිටි අඹු සැමි යුවලකව මරා දැමීමේ සිද්ධියට පුද්ගලයින් හත් දෙනෙකු අත් අඩංගුවට ගෙන සිටියි.
උපන් දින සාදයට සහභාගී වී සිටි අඹුසැමි යුවලේ කාන්තාව ඊට පෙර ග්‍රාම නිලධාරියෙකු සමග ඇසුරක් පවත්වා ඇති අතර එය නතර කොට වෙනත් අයෙකු සමග විවාහ වීම නිසා ඇගෙන් පලි ගැනීමට ග්‍රාම නිලධාරීවරයා විසින් ලබා දෙන ලද කොන්ත්‍රාත්තුවක් මත අඹූ සැමි යුවලම ඝාතනයට ලක් වූ බව පොලිස් පරීක්ෂණ වලදී හෙලි වුණි.
එම සිද්ධියෙන් මියගියේ වවුනියාව ඕමන්ත ප්‍රදේශයේ පදිංචිව සිටි 35 හැවිරිදි සුගන්දන් සහ ෆාතිමා සසීමා නැමති අඹු සැමි යුවලය.
එම ද්විත්ව ඝාතනයට සම්බන්ධ සැකකරුවන් හත් දෙනා දැනට වසරක් තිස්සේ රිමාන්ඩ් බන්ධනාගාරයේ සිටින අතර ඔවුන්ව අවස්ථා 9 කදී වවුනියාව දිස්ත්‍රික් අධිකරණයට හා මහාධිකරණයට ඉදිරිපත් කොට ඇතත් ඔවුන්ට ඇප ලබා දී නොතිබුණි.
ඒ බව සඳහන් කරමින් සැකකරුවන් වෙනුවෙන් වවුනියාව මහාධිකරණය වෙත පෙත්සමක් ගොණු කොට තිබූ අතර එම පෙත්සම සලකා බැලූ අවස්ථාවේදී රජයේ නීතීඥ ආරුමුගම් ධනුසන් සහ විශේෂ අපරාධ විමර්ශන කොට්ඨාසයේ පොලිස් නිලධාරියා ඇප ලබාදීමට එරෙහිව කරුණු දැක්වූ නිසා වවුනියාව මහාධිකරණ විනිසුරුවරයා සැකකරුවන්ට ඇප ලබා දීම ප්‍රතික්ෂේප කොට ඔවුන්ගේ රිමාන්ඩ් කාලය දීර්ග කරමින් නියෝගයක් නිකුත් කළේය.
ඒ අනුව පලවෙනි හා හත්වෙනි විත්තිකරුවන් දෙදෙනාගේ රිමාන්ඩ් කාලය නොවැම්බර් මස 1 වෙනිදා දක්වාද ඉතිරි පස් දෙනාගේ රිමාන්ඩ් කාලය පෙබරවාරී මස 25 දක්වාද දීර්ඝ කෙරුණි.
