අඟහරු ග්‍රහයා මත ජීවත්වීම පිළිබඳ පර්යේෂණ සඳහා නාසා ආයතනය විසින් තෝරාගත් සිව් පුද්ගල කණ්ඩායමක් මෙහෙයුම් ආරම්භ කර ඇති බව නාසා ආයතනයේ ජොන්සන් අභ්‍යවකාශ මධ්‍යස්ථානය නිවේදනය කර තිබේ.
සිව් දෙනෙකුගෙන් යුත් කණ්ඩායමට ශ්‍රී ලාංකිකාවක් වන “පියුමි විජේසේකර” ඇතුළත් බව පැවසේ/
නාසා හි ජොන්සන් අභ්‍යවකාශ මධ්‍යස්ථානයේ නිර්මාණය කරන ලද අඟහරු පරිසරයේ අනුරුවක් වන Human Exploration Research Analog (HERA) තුළ දින 45ක් ගත කළ පළමු කණ්ඩායම මෙම කණ්ඩායමයි.
ඔවුන් මැයි 10 සිට ජූනි 24 දක්වා මෙම ආදේශක මොඩලය තුල පර්යේෂණ සිදු කරනු ඇත.
විශේෂයෙන්ම, එහිදී සඳ, අඟහරු සහ ඉන් ඔබ්බට ගැඹුරු අභ්‍යවකාශ මෙහෙයුම් සඳහා යැවීමට පෙර ගගනගාමීන් හුදකලාව, කුඩා අවකාශයන්හි දිගු කාලයක් සහ දුරස්ථ තත්වයන්ට අනුගත වන ආකාරය අධ්‍යයනය කරයි.
මේ වසරේ මෙම පර්යේෂණයට සහභාගී වූ දෙවන කණ්ඩායම මෙම පිරිස වන අතර මෙම වසර අගදී තවත් කණ්ඩායම් දෙකක් පර්යේෂණ සඳහා සහභාගී වීමට අපේක්ෂා කෙරේ.
ශ්‍රී ලාංකීය සම්බවයක් සහිත පියුමි විජේසේකර කැලිෆෝනියාවේ සිලිකන් නිම්නයේ NASA Ames පර්යේෂණ මධ්‍යස්ථානයේ විකිරණ ජෛව භෞතික විද්‍යාගාරයේ පශ්චාත් ආචාර්ය උපාධි පර්යේෂණ විද්‍යාඥවරියක් ලෙස කටයුතු කරයි.
පියුමි, සැන් ඩියාගෝ හි කැලිෆෝනියා විශ්ව විද්‍යාලයෙන් ජෛව ඉංජිනේරු විද්‍යාව පිළිබඳ උපාධියක් ද, පෙන් පිට්ස්බර්ග්හි කානගී මෙලන් විශ්ව විද්‍යාලයෙන් ජෛව වෛද්‍ය ඉංජිනේරු විද්‍යාව පිළිබඳ ශාස්ත්‍රපති සහ ආචාර්ය උපාධියක් ද ලබා සිටිනා විද්‍යාඥවරියකි.
පියුමි විජේසේකර දැනට පදිංචිව සිටින්නේ ඇමරිකාවේ සැන් ෆ්‍රැන්සිස්කෝ නගරයේය.
