“ඔයා කොහොමද සුදුපාට වුණේ? කියා අම්මලගෙන් අහගෙන මට ලිපියක් ගෙනත් දෙන්නැයි ගුරුතුමියක් සිසුවකුට පැවසීම නිසා මවුපියන් දෙදෙනා කලබලයට පත්ව පාසලට යෑමේ පුවතක් කොළඹ දිස්ත්‍රික්කයේ ජනප්‍රිය පාසලකින් වාර්තා වෙනවා.
සිද්ධිය මෙසේය. 18 වැනි වියේ පසුවන ඔහු එම පාසලේ අ.පො.ස. උසස් පෙළ හදාරයි. මව සහ පියා පියකරු පෙනුමෙන් හා සුදුවර්ණයෙන් හෙබි අඹුසැමි යුවළකි.
එනිසා පුතා ද වඩාත් සුදු වර්ණයෙන් හා පියකරු පෙනුමෙන් යුක්තය.
සුදු පැහැති රුව නිසා කාගේත් නෙත් සිත් ඔහු වෙත ඇදී ගියේය.
ගුරුතුමිය විවාහකය, දරු සුරතල් බලමින් 48 වැනි වියේ පසු වන්නීය. ඇය කලාවට සම්බන්ධ වෘත්තියක නියැළෙන්නියකි.
එනිසා ඇය තමාට ආවේණික කලා ඇසින් දරුවා දෙස බැලුවාද? නැතහොත් තමාටත් සුදුවීමට ගුරුවරියට සිතුනා ද? යන්න ප්‍රශ්නයකි.
ගුරුවරිය දරුවාගෙන් සුදුපාට වුණේ කෙසේ දැයි විමසීම නිසා කෝපයට පත් මවුපියන් ගුරුවරියට පාඩමක් ඉගැන්වීමට පාසලට පැමිණියත් ගේට්ටුව අසල දී තවත් පිරිසක් කරුණු පහදා දී ඔවුන් ආපසු යැව් බව පැවැසේ.
