අමෙරිකා එක්සත් ජනපදයේ බැල්ටිමෝ ප්‍රදේශයේ පැටප්ස්කො ගංගාව හරහා තිබූ ලෝ ප්‍රකට විශාල පාලමක් වන සැතපුම් 1.6ක් දිගැති ෆැන්සිස් ස්කොට් කී පාලමේ ඊයේ (26) උදෑසන ගැටී ඇති සිංගප්පූරුවේ ධජය සහිත යාත්‍රාව කොළඹ බලා යාත්‍රා කරමින් තිබූවක් බව වාර්තා වේ.
ඩාලි නම් එම භාණ්ඩ ප්‍රවාහන නෞකාව අද අලුයම 1.30ට පමණ ෆ්‍රැන්සිස් ස්කොට් කී පාලමේ එක් කණුවක ගැටීම හේතුවෙන් පාලම පැටප්ස්කෝ ගංගාවට කඩා වැටී ඇත.
ඩාලි නෞකාව පාලමේ ගැටෙන මොහොතේ මෝටර් රථ සැලකිය යුතු ප්‍රමාණයක් පාලම මත ගමන් කරමින් තිබී ඇති බවත් පාලම කඩා වැටීම හේතුවෙන් මෝටර් රථ කිහිපයක් ගංගාවට වැටී ඇති බවත් මේරිලන්ඩ් ආණ්ඩුකාර වෙස් මුවර් ප්‍රකාශ කර තිබේ. පැය 5 සෝදිසි මෙහෙයුමකින් පසු ගංගාවට වැටුණු පුද්ගලයන් දෙදෙනකු බේරා ගැනීමට හැකි වුවත් ඉන් එක් අයෙකුගේ තත්වය යහපත් නොවන බව විදෙස් මාධ්‍ය වාර්තා කරයි. එසේම අවම වශයෙන් තවත් හත් දෙනකු ගංගාවට වැටි අතුරුදන් වී ඇති බවත් මේ වන හදිසි තත්වයක් ප්‍රකාශ කර තිබෙන බවත් එම ආණ්ඩුකාරවරයා උප්‍රටා දක්වමින් විදෙස් මාධ්‍ය වාර්තා කරයි.
ෆෙඩරල් විමර්ශන කාර්යාංශය (FBI) සමග එක්ව සිදුවීම සම්බන්ධයෙන් ඇමෙරිකානු වෙරළ ආරක්ෂකයන් විමර්ශනයක් ආරම්භ කර තිබෙන බවත් ඉදිරියේදී සියලු තොරතුරු අනාවරණය වනු ඇති බවත් බැල්ටිමෝර් පොලිසිය උපුටා දක්වමින් විදෙස් මාධ්‍ය වාර්තා කරයි. ෆ්‍රැන්සිස් ස්කොට් කී පාලම පැටප්ස්කෝ ගංගාවට අඩි 184 ඉහළින් පිහිටා ඇති බවත් තවමත් මුදා ගැනීමේ මෙහෙයුම් ක්‍රියාත්මක වන බවත් විදෙස් මාධ්‍ය බැල්ටිමෝර් පොලිසිය ප්‍රකශ උපුටා දක්වමින් වාර්තා කරයි.
