මේ තරුණයා නගරයේ ජංගම දුරකතන අලුත්වැඩියා කරන මධ්‍යස්ථානයකට සිය ජංගම දුරකතනය රැගෙන ගියේ, එහි ඇතිවූ වීඩියෝ දුරකථන ඇමතුමේ අවුලක් ලිහා ගැනීමටය. ඒ තමාට වෙනදා මෙන් ළඟක සිට සිය ජංගම දුරකතනයට වීඩීයෝ කෝල් නොඑන නිසාය.
ජංගම දුරකතන අලුත්වැඩියා කරන කාර්මිකයා තරුණයාගේ ජංගම දුරකතනයේ තිබූ දෝෂය සොයාගෙන එම දුරකතනයට යළි වීඩියෝ කෝල් එන විදිහට සාදාදී වීඩියෝ ඇමතුමක් ගන්නා ලෙස තරුණයාට ජංගම දුරකතන කාර්මිකයා කීවේය. ඒ අනුව එම කාර්මිකයා ඉදිරියේම තරුණයා කාන්තාවක් සමග වීඩියෝ කෝල් එකට සම්බන්ධ විය. තමාට හොඳින් දැක පුරුදු රූපයක් හෙයින් ජංගම දුරකතන කාර්මිකයාද එම ඇමතුම පිළිබඳව විමසිලිමත් විය. එවිටම ඔහුට උන්හිටි තැන් අමතක විය. තරුණයාගෙන් ජංගම දුරකතනය උදුරා ගත්තේ මංකොල්ලකරුවකු ලෙසය. ‘කවුද ඒ ගෑනු කෙනා’ යැයි කාර්මිකයා තරුණයාගෙන් ඇසූවිට ඔහු කිසිදු කලබලයක් නොමැතිව පැවසුවේ තමාගේ පෙම්වතිය බවය.
‘ඇයි අයියේ මොකද්ද ප්‍රශ්නය?’ යැයි තරුණයා ඔහුගෙන් ඇසූවිට ඒ මගේ බිරිය යැයි කාර්මිකයා යටිගිරියෙන් කෑගැසුවේ තරුණයාට උතුර දකුණ අමතක වන ලෙසය. එයින් බියට පත්වූ තරුණයා තමා මගහැරුණු ඇමතුමකින් පෙමින් වෙලී ඇත්තේ විවාහක කාන්තාවක් සමග බව වැටහී රුපියල් විසිදහසක් වන සිය ජංගම දුරකතනය ද දමා එතනින් දිවගියේ තව එහි සිටියහොත් ඒකාන්තයෙන්ම ගුටි පූජාවකට මුහුණ දීමට සිදුවන නිසාය.
