එම දෙපාර්තමේන්තුව පවසන්නේ, කිරි සහ මස් නිෂ්පාදනයට ගවයින් සහ එළුවන් වැනි සතුන් ආනයනය කළත් මෙරට දේශගුණික තත්ත්වයන්ට ඔරොත්තු නොදීම සහ රෝගාබාධවලට ගොදුරුවීම නිසා එම සතුන් මියයන බව යි.
එබැවින් කිරි සහ මස් නිෂ්පාදනය ඉහළ නැංවීමට මෙරටට ගැලපෙන ගව සහ එළු විශේෂ දෙකක් හඳුන්වාදීමට, පර්යේෂණ ඇරඹීමට කෘෂිකර්ම අමාත්‍ය මහින්ද අමරවීර මහතා සත්ත්ව නිෂ්පාදන හා සෞඛ්‍ය දෙපාර්තමේන්තුවට උපදෙස් දී තිබෙනවා.
නිලධාරීන් පෙන්වා දෙන්නේ එවැනි පර්යේෂණයක් සඳහා වසර 5 -7ක් පමණ කාලයක් ගත වන බව යි.
පසුගියදා පේරාදෙණිය සත්ත්ව නිෂ්පාදන හා සෞඛ්‍ය දෙපාර්තමේන්තුවේ පැවති සාකච්ඡාවක දී කෘෂිකර්ම අමාත්‍යවරයා පැවසුවේ, වසර 5 කට පෙර මෙම ව්‍යාපෘතිය ආරම්භ කළේ නම්, අද වන විට කිරි සහ මස් ආනයනය අවශ්‍යය නොවන බව යි.
