අදාළ මහාචාර්යවරුන් තිදෙනා විසින් සිදු කරන ලද අධ්‍යයනයට අනුව චීනයේ ප්‍රධාන නගරවල සිට ග්‍රාමීය ප්‍රදේශ දක්වාම මෙම දිනවල ශීඝ්‍රයෙන් පැතිර යමින් පවතින කොරෝනා වසංගත රැලි මර්දනය කිරීම සඳහා දැනට රට පුරා පනවා ඇති සීමාවන් හා අගුලු දැමීම් ලිහිල් කළහොත් චීනයේ ජනගහනයෙන් මිලියනයකට 684 දෙනෙකු කොරෝනා ආසාදනය හේතුවෙන් මිය යෑමේ අවදානමක් පවතී. සමස්ත ජනගහනයම කොරෝනා පරීක්ෂණවලට ලක් කරමින්, කොරෝනා ආසාදිතයන් නිරෝධායනයට ලක් කරමින් හා කොරෝනා ආසාදිතයන්ගේ ආශ්‍රිතයන් සෙවීමේ දැවැන්ත මෙහෙයුම් දියත් කරමින් රට පුරා දැඩි ලෙස අගුලු දැමීමේ නීති රීති පැනවීම හේතුවෙන් එම සීමාවන් ඉවත් කරන ලෙස ඉල්ලා රට පුරා මහජන උද්ඝෝෂණ මේ වන විට ක්‍රියාත්මක වෙමින් පවතී. පනවා ඇති කොරෝනා මර්දන සීමාවන් හේතුවෙන් දෛනික අවශ්‍යතාවයන් සපුරා ගැනීම මෙන්ම ව්‍යාපාරික කටයුතු පවත්වාගෙන යාම අසීරු වී ඇති බව පවසමින් එම සීමාවන් ඉවත් කරන ලෙස මහජනතාව රජයෙන් කරන ඉල්ලීම් මේ වන විට වැඩි වී තිබේ.
මෙම තත්ත්වය සැලකිල්ලට ගෙන පනවා ඇති අගුලු දැමීම් ඇතුළු කොරෝනා මර්දන සීමාවන් ලිහිල් කිරීමට චීන බලධාරීන් මේ වන විට සැලසුම් කරමින් සිටින බව වාර්තා වී තිබේ.
සංස්කරණය – ඒමන්ති මාරඹේ
