ත්‍රීවීල් මීටරය අනිවාර්යයි

මගී ප්‍රවාහන ත්‍රිරෝද රථ සඳහා මීටරයක් අනිවාර්ය කිරීමේ නීතිය නැවත බලාත්මක කිරීමට මාර්ග ආරක්ෂාව පිළිබඳ ජාතික සභාව තීරණය කර ඇත.

ඒ අනුව මෙම නීතිය එළඹෙන ඔක්තෝබර් මස දෙවන සතියේ සිට අනිවාර්ය කිරීමට මාර්ග ආරක්ෂාව පිළිබඳ ජාතික සභාවේ සභාපති වෛද්‍ය සිසිර කෝදාගොඩ මහතා තීරණය කර තිබේ.

මගී ප්‍රවාහන ත්‍රිරෝද රථ සඳහා සුදුසු මීටරයක් සවිකර
ගැනීමට ඉතා දීර්ඝ කාලයක් ලබා දී තිබූ බවත් ඒ අනුව එම කාලය තවදුරටත් ලබාදිය නොහැකි බවත් හෙතෙම කීවේය.

ත්‍රිරෝද රථ කර්මාන්තයේ ගුණාත්මක බව වැඩි කරමින් මගී ජනතාව වැඩි වශයෙන් ත්‍රිරෝද රථ සේවාවන් ලබා ගැනීමට මෙමගින් හැකිවෙන බව පවසන සිසිර කෝදාගොඩ මහතා එමගින් මගී ප්‍රවාහන ත්‍රිරෝද රථ හිමියන්ගේ ආදායම් සුරක්ෂිත වන බවද පැවැසීය.

මීට අමතරව ඉදිරියේදී මගී ප්‍රවාහන ත්‍රිරෝද රථ ව්‍යාපාරය ගුණාත්මක  ප්‍රවාහන සේවයක් බවට පත් කිරීමට තවත් පියවර කිහිපයක් ආරම්භ කරන බවද ඒ මහතා වැඩිදුරටත් පැවැසීය.