තරඟයේ කාසිය වාසිය දිනූ ශ්‍රී ලංකා නායකයා පළමුව පන්දුවට තීරණය
කළ අතර ශ්‍රී ලංකා පළමු ඉනිම සඳහා සඳහා සියලූ දෙනා දැවී රැස් කළ ලකුණු සංඛ්‍යාව 205ක්.
පළමු ඉනිම ක්‍රීඩා කළ ඉන්දීය පිල කඩුලු 6 ක් දැවී ලකුණු 610 ක් ලබා සිටියදී සිය ඉනිම අත්හිටුවනු ලැබුවා.
එහිදී ඉන්දීය කණ්ඩායම වෙනුවෙන් විරාත් කෝලි ද්විත්ව ශතකයක් වාර්තා කළ අතර මුරලි විජේ, චේතිශ්වර් පුජාරා සහ රෝහිත් ශර්මා ශතක රැස් කිරීමට සමත් වුණා.
ඒ අනුව ඉනිමක පරාජයෙන් ගැලවීමට ඉන්දීය පළමු ඉනිමට වඩා ලකුණු 405ක් පිටුපසින් සිටිමින් දෙවන ඉනිම ආරම්භ කළ ශ්‍රී ලංකා කණ්ඩායමට සියලු ක්‍රීඩකයින් දැවී රැස් කර ගත හැකි වුයේ ලකුණු 166ක් පමණයි.
ශ්‍රී ලංකා දෙවන ඉනිමේ වැඩිම ලකුණු ලාභියා බවට පත් වුණේ නායක දිනේෂ් චන්දිමාල්.
ඔහු ලකුණු 61ක් රැස් කළ අතර සුරංග ලක්මාල් නොදැවී ලකුණු 31ක් රැස් කිරීමට සමත් වුණා.
පන්දු යැවීමේදී ඉන්දීය කණ්ඩායමේ රවීචන්ද්‍රන් අශ්වින් කඩුලු 04ක් බිඳ දැමූ අතර ඉෂාන්ත් ශර්මා, රවීන්ද්‍ර ජඩේජා, උමේෂ් යාදෙව් කඩුලු 02 බැගින් දවා ගත්තා.
ශ්‍රී ලංකාදෙවන ඉනිමේ අවසන් කඩුල්ල දවා ගත් රවීචන්ද්‍රන් අශ්වින් සිය ජාත්‍යන්තර ටෙස්ට් කඩුලු 300 සීමාව පසුකර යාමට සමත් වුණා.
ඒ අනුව අඩුම ටෙස්ට් තරඟ සංඛාවක් ක්‍රීඩා කරමින් කඩුලු 300 සීමාවට ලඟා වූ පළමු පන්දු යවන්නා බවට පත්වීමට අශ්වින් සමත් වීම විශේෂත්වයක්.
ඔහු මෙම තරඟයේ ඉනිම දෙක තුලදී කඩුලු 08ක් බිඳ හෙලීමට සමත්වූණා.
ඉන්දීය කණ්ඩායමේ නායක විරාත් කෝලි තරඟයේ වීරයා සම්මානයටද හිමිකම් කීවා.
තරඟ තුනකින් සමන්විත ටෙස්ට් තරඟාවලිය එක් තරඟයක් ජයගෙන ඉන්දීය කණ්ඩායම මේ වන විට පෙරමුණේ පසුවන අතර පළමු තරඟය අවසන් වුනේ ජය පරාජයෙන් තොරවයි.
