ඇය අධිශ්ඨානයෙන් යුතුව කටයුතු කළ දියණියක්.. ඒ නිසාම ඇගේ අරමුණ වෙත ළඟා වෙන්න ඇයට පුළුවන් වෙලා..
මේ කියන්න යන්නේ අන්න ඒ ගැන ඇසෙන කතාවයි..
ඇය නමින් ජිස්ලේන් සිල්වා.. 35 හැවිරිදි වියේ පසුවන ජිස්ලෙන් වයස අවුරුදු 9 දී ඇයගේ පියා අමානුෂික ලෙස ඝාතනයට ලක්වුණේ ඇයත් නොසිතන මොහොතකයි..
පොලිසිය මග හරිමින් සිටි සිය පියාගේ ඝාතකයා නීතිය ඉදිරියට ගෙන ඒමට පොලිස් නිලධාරිනියකවී පියා ඝාතනය කර වසර 25 කට පසුව ඝාතකයා නීතිය ඉදිරියට ගෙන ඒමට සමත්වූ දියණියක් පිළිබඳව බ්‍රසීලයෙන් වාර්තා වෙනවා..
ජිස්ලෙන් යුක්තිය සොයමින් වසර 20 කට අධික කාලයක් වැය කර ඇති අතර අවසානයේ ඇයම පොලිස් නිලධාරිනියක ලෙස සාක්ෂි පසුපස හඹා යමින් සිය පියාගේ ඝාතකයා නීතිය ඉදිරියට ගෙන ඒමට සමත් වුණා..
පියාගේ ඝාතකයා නීතිය ඉදිරියට ගෙන එමින් සිය පවුලට යම්කිසි සැනසීමක් ලබාදීමට අවසානයේදී ජිස්ලෙන්ට හැකියාව ලැබුණා...
ජිස්ලෙන්ගේ පියා වන ජිරාල්ඩෝ ජොසේ විසෙන්ටේ 1999 වසරේ තැබෑරුමකදී ඇතිවූ ආරවුලක්දී හිසට වෙඩි තැබීමෙන් ඝාතනයට ලක්ව ඇති අතර, වෙඩි තැබීම සිදුකර ඇත්තේ රයිමුන්ඩෝ අල්වේස් ගෝමස් නැමැත්තෙක් බව හඳුනාගත් පොලිසිය ඔහුට විරුද්ධව මිනීමැරීමේ චෝදනා ගොනු කර තිබුණා..
අවසානයේදී 2013 වසරේදී අධිකරණය හමුවේ රයිමුන්ඩෝ වරදකරුවී ඒ සඳහා වසර 12 ක සිර දඬුවමක් නියම වුවත් එම අවස්ථාවේ ඔහු පොලිසිය මග හරිමින් සැඟවුණා..
පොලිසියෙන් සැඟවුණු සිය පියාගේ ඝාතකයා නැවතත් නීතිය ඉදිරියට ගෙන ඒමේ අධිෂ්ඨානයෙන් ජිස්ලේන් පොලිස් නිලධාරිනියක වී ඇති අතර අවසානයේ පසුගිය 26 වැනිදා රයිමුන්ඩෝ අල්වේස් ගෝමස් නැවතත් අත් අඩංගුවට ගැනීමට ඇය සමත් වුණා.. අත් අඩංගුවට ගැනීමෙන් පසුව ජිස්ලේන් විසින් රයිමුන්ඩෝ අධිකරණයට ඉදිරිපත් කරනු ලැබූ අතර එහිදී 2013 වසරේදී ඔහුට ලබාදුන් සිර දඬුවම ක්‍රියාත්මක කිරීමට අධිකරණය නියම කර තිබුණා..
රයිමුන්ඩෝ ඝාතනය සිදුකරන විට 35 වැනි වියේ පසුව ඇති බවත් අවසානයේ 60 වැනි වියේදී නීතිය ඉදිරියට ගෙන ඒමට ජිස්ලෙන්ට හැකියාව ලැබී ඇති බවත් විදෙස් මාධ්‍ය වාර්තා කළා..
