තම බිරිය මියගොස් ඇති බවට පවසා නගරයේ ඇති මල් ශාලාවකට ගොස් රුපියල් 40,000ක් වටිනා මිනී පෙට්ටියකට මුදල් ගෙවා මල් වඩමක්, ඇඳුම් සහ අනිකුත් අවමංගල භාණ්ඩද වෙන්කරවාගෙන මල් ශාලාවේ වෑන් රථයකින් නිවසට මිනී පෙට්ටිය ඇතුළු භාණ්ඩ රැගෙන ගිය පුද්ගලයෙකු පිළිබඳ පුවතක් බළන්ගොඩ ප්රදේශයෙන් වාර්තා වනවා.
බිරිය රෝගාතුරව සිටි බවත් මරණය සම්බන්ධයෙන් සැකයක් නොමැති බවට මරණ පරීක්ෂක ඇතුළු නිලධාරින්ද පැවැසූ බව මොහු විසින් මල්ශාලාවට පවසා ඇති අතර ඔවුන් එය විශ්වාස කර මෙම භාණ්ඩ රැගෙන ගොස් තිබෙනවා.
එහිදී මව මියගොස් නැති බවත් මව මුළුතැන්ගෙයි සිටින බවටත් දරුවන් පවසා තිබෙන අතර මල් ශාලාවේ සේවකයින් මිනී පෙට්ටිය ආපසු රැගෙන යෑමට උත්සාහ කිරීමේ දී අදාළ පුද්ගලයා විසින් එම සේවකයින්ට තර්ජන කිරීම නිසාවෙන් ඔවුන් මිනී පෙට්ටිය නිෙවස තුළ දමා පිටව ගොස් ඇති බව සඳහන්.
මේ සමබන්ධයෙන් වැඩිමහල් දරුවා සහ මල් ශාලාවේ හිමිකරු 119 හදිසි දුරකතන අංකයට දැනුම්දීමක් කර ඇති බව වාර්තා වනවා.
පසුව බළන්ගොඩ පොලිසියේ නිලධාරින් දෙදෙනකු එම නිෙවසට ගොස් මිනී පෙට්ටිය මල් ශාලාවේ සේවකයින් වෙත ආපසු රැගෙන යෑමට භාර දී තිබෙනවා.
මිනී පෙට්ටිය වෙනුවෙන් මල් ශාලාවට ගෙවූ රුපියල් 40000ක මුදල නැවත රැගෙන යෑම සඳහා මල් ශාලාවට පැමිණෙන ලෙස බිරියට සහ සැමියාට දැනුම් දී ඇති බව සඳහන්.
