‘(දොස්තර) විරංජිත් තාඹුගල’ අත්අඩංගුවට පත් වීම පසුගිය දින කිහිපයේ සමාජ මාධ්‍යයේ අතිශය කතාබහට ලක් වූ ‘සිදුවීමක්’ වුණා.
‘විරංජිත් තාඹුගල’ විසින් ලංකාවේ ජනප්‍රිය සංගීත කණ්ඩායම් 21ක්, අතිවිශාල මුදලකට ‘මිලයට ගැනීම’ (ලක්ෂ 50කටත් වැඩි) පසුගිය සමයේ සංගීත ක්ෂේත්‍රයේ මතභේදයට ලක්වුණා ඔබටත් අමතක නැතුව ඇති.
එවන් තත්ත්වයක් තුළ සංගීත කණ්ඩායම් බොහෝමයක්, ‘ගෙවීම් කටයුතු’ නිසි ආකාරයෙන් සිදු නොවන බැව් කියමින් ‘අවුරා ලංකා’ ගිවිසුමෙන් ඉවත්වීමට ද කටයුතු කර තිබුණා. (මේ ගැන සමාජ මාධ්‍ය තුළත් ලොකු කතාබහක් ඇතිවුණා)
‘අවුරා ලංකා’ හා ගිවිසුම් ගත වූ ‘සකුරා රේන්ජ්’ සංගීත කණ්ඩායමේ නායක ‘අජිත් මුතුකුමාරණ’ අවස්ථා කිහිපයකදී ම ‘අවුරා ලංකා’ වෙනුවෙන් ‘දරදිය අදින්නට’ කටයුතු කර තිබුණා.
‘අවුරා ලංකා’ වෙත එදිරි ප්‍රකාශවලට පවා ඔහු සිය ‘මුහුණු පොත’ හරහා දරුණු ප්‍රතිචාර දක්වා ඇති අයුරු අපට නිරීක්ෂණය වුණා.
‘දෙපාර්ශවයේ ම කැමැත්ත මත මේ ගිවිසුම ගැහුවේ… මම කියන් නෑ ගැහුව ෂෝ ඔක්කොම සක්සස් කියලා. මේක තාම අපි අත්හදා බැලීම් කරමින් යන ගමනක්… කෑම එක බලාගෙනම මේ වැඩේ කළා නෙවෙයි. මේ වැඩේට අකුල් හෙළනව නම් මොකද්ද පදනම? මම මගේ බෑන්ඩ් එකේ කවුරුවත් අනාථ කරන්නෙ නෑ…..’ (අජිත් මුතුකුමාරණ, ‘ගීත්’ යූටියුබ් චැනලය සමඟ අදහස් දක්වමින්)
කෙසේ වෙතත්, කාලයාගේ ඇවෑමෙන් ‘අජිත්’ සහ ‘තාඹුගල’ විරසක වූ අතර, මේ බැව්, අජිත් සිය මුහුණු පොතේ ද සටහන් කොට තිබුණා. (ඒ මීට මාස කිහිපයකට පෙර දී) එමෙන්ම අජිත්ගේ ‘සකුරා රේන්ජ්’ සංගීත කණ්ඩායම ද මේ හා සමඟ නතර කෙරුණා.
‘සකුරා රේන්ජ් නැවත දැනුම් දෙනතුරු තාවකාලිකව නවතා ඇත!!’
‘ඉන්නකන් හොඳ අහන, ගියාම බැනුම් අහන, බෑන්ඩ් ගැහිල්ල!’
‘හොඳම මිතුරන් ද ලොකුම සතුරෝ වෙති!!’
කෙසේ වෙතත්, ‘තාඹුගල අත්අඩංගුවට පත් වීම’ සිදු වූ වහාම අජිත් සිය සමාජ මාධ්‍යයේ නවතම සටහනක් යොදා තිබුණා.
‘පරිස්සමින් වචන හසුරුවන්න, කරන කියන සියල්ලම පේනවා දන්නවා.
උත්තර දුන්නේ නැහැ තවම.
විබාගෙට ඉඳගත්තා විතරයි.
උකුස්සෝ එක්ක පියබන්න ඕනිනම් පාත්තයන්ගේ ඇසුර අනවශ්‍යයි.
වෙසක් පෝය දවසේ කර්මය ඉස්සරහට ආව ලස්සන’
