රැෆෙලාගේ මෙවර තරු කැලැන්ඩරය ගැන තතු ඊයේ අපි ඔබට කිව්වා.
ඒ මෙවර එහි ඇති විශේෂත්වයන් කිහිපයක්ම ගැනත් සඳහන් කරමින්.
එහි වූ විශේෂත්වයන් අතර කාගෙත් අවදානය වැඩියෙන් දිනාගෙන තිබුණෙ කෘත්‍රිම බුද්ධිය යොදාගෙන නිමවන ලද, දැයෙන් සමුගත් සකල කළා සක්විති ජැක්සන් ඇන්තනී මහතාගේ රුව.
මේ එම සුවිශේෂී කටයුත්ත පිළිබඳව ජැක්සන් ඇන්තනී මහතාගේ ආදරණීය බිරිඳ ජනප්‍රිය යූටියුබ් නාලිකාවක් සමඟ දැක්වූ අදහස් කිහිපයයි...
''ඇත්තටම පණ පිහිටවලා වගේ. මම හරි සංවේදී වුණා මේ පිංතූරය මුලින්ම දකිනකොට.
මේ නිර්මාණකරුවන්ට මම මගේ හදපිරි ස්තුතිය පිරිනමනවා.
ඇත්තටම ජැක්සන්ගෙ වටිනාකම දකින අය මේ කරන ව්‍යායාමය ගැන මම ගොඩක් ස්තුතිවන්ත වෙනවා.
තව බොහෝ කාලයකට ජැක්සන්ගේ දැනුම අවශ්‍ය වෙයි අපේ අධ්‍යාපන ක්ෂේත්‍රයට, කලා ක්ෂේත්‍රයට, ඒ වගේ හුඟක් ක්ෂේත්‍රවලට...
ඇත්තටම පුදුම දුකක් තියෙන්නෙ.
අවුරුදු 65කට හුඟාක් වැඩ කරපු කෙනෙක්.
හැබැයි ඔහුගේ පැසුණු දේවල් මම දන්නවා මම ගෙදර හිටපු කෙනෙක් හැටියට, තව කොච්චර දේවල් කරන්න හිටියද කියලා.
ඒ ටික කරන්න කලින් මෙහෙම යන්න වෙච්ච එක ගැන, හරි පසුතැවීමක් සහ දුකක් තියෙනවා.
කරන්න දෙයක් නෑ. මම බෞද්ධ කෙනෙක්. ඇති වන හැමදේම නැති වෙනවා කියන ධර්මතාවයට හිස නමන්න වෙනවා.
මොනව කරන්නද. අපි දෙන්නගෙන් කවුරු හරි ඉස්සර වෙන්න වෙනවා.
ඉස්සර අපි දෙන්නා රණ්ඩු කරනවා මම ඉස්සර වෙලා යන්නෙ කියලා. කොහොමත් ජැක්සන් දිනුවා.
මේ කරදරවලින් නිදහස් වෙලා දැන් එයා නිදහස්ම තැනක ඉන්නවා මට විශ්වාසයි. අපි තාම කරදරෙන් ඉන්නවා.
මේ කරදර ඉවර වෙච්ච දවසක මාත් එතෙන්ට යන්න බලාපොරොත්තු වෙනවා....''
