විදුලිබල මණ්ඩලයේ මනු කියවන්නකු විල්ලෝරාවත්ත නිවසකට සැලසුම් සහගතව ගෙන්වාගෙන නිරුවත්කර පහරදී රුපියල් ලක්ෂයකට ආසන්න මුදල් කොල්ලකෑ පස්දෙනකුගෙන් යුත් තරුණ කල්ලියක් අත්අඩංගුවට ගත් බව මොරටුමුල්ල පොලිසිය කියයි.
අත්අඩංගුවට ගත් පිරිස වයස අවුරුදු 17 හා 20 අතර පසුවන්නන් බව පොලිසිය පවසයි.
“ග්‍රින්ඩර් “යනුවෙන් සඳහන් ඇප් එකක අත්අඩංගුවට ගත් සැකකාර තරුණයකු ලියාපදිංචිවී, ශරීරය සම්බාහනය කරගැනීම සඳහා මනු කියවන්නාව විල්ලෝරවත්තේ නිවසට සූක්ෂම ලෙස ගෙන්වාගෙන මෙම කොල්ලකෑම සිදුකර තිබූ බව පොලිසිය කියයි.
බණ්ඩාරගම ප්‍රදේශයේ පදිංචි මනුකියවන්නා සැකකාර තරුණයා ජංගම දුරකථනයට ඒවා තිබූ ගමන් මාර්ගය (location) ඔස්සේ විල්ලෝරාවත්ත නිවස සොයා යෑමෙන් අනතුරුව, ඔහුට නිවසට පැමිණෙන ලෙස ඇරයුම් කළ තරුණයා ඔහුගේ ද ඇඳුම් ද උනාදමා නිරුවත්වීමෙන් අනතුරුව පැමිණි මනු කියවන්නාද නිරුවත් කර ඇතැයි පොලිසිය පවසයි.
මඳ වේලාවක් ගත වෙද්දී නිවස වටා සැඟව සිටි අනෙක් සෙසු තරුණයන් නිවස තුළට කඩාවැදී නිරුවත්ව සිටින මනු කියවන්නාට පහරදී මරණ තර්ජනය කර, තරුණයෙකුට ලිංගික අතවර කිරීම සඳහා පැමිණි බවට ඔහුව පොලිසියට අල්ලා දෙන බව පවසා බියගන්වා, ඔහු සන්තකයේ තිබූ ATM කාඩ්පත සහ රහස් අංකය ලබාගෙන එයින් රුපියල් 70000/= මුදලක්ද ක්‍රෙඩිට්කාඩ් පතින් රුපියල් 29000/ = ලබාගෙන තිබූ බව පොලිසිය සඳහන් කරයි.
අදාළ සිදුවීම ඉකුත් 11 වැනිදා සිදු වී තිබේ.
ඒ අනුව, විමර්ශන පැවැත්වූ පොලිසිය විල්ලෝරාවත්ත ,රාවතාවත්ත හා ලක්ෂපතිය ප්‍රදේශවල පදිංචි සැකකාර තරුණයන් අත්අඩංගුවට ගත් බව පොලිසිය කියයි.
අත්අඩංගුවට ගත් සැකකාර තරුණයන්ගෙන් කීපදෙනෙකු මීට පෙරද හමුදා මේජර්වරයකු, විද්‍යාල සිසුවකුද ඒ ආකාරයෙන්ම නිවසට ගෙන්වා නිරුවත්කර පහරදී මරණීය තර්ජනය කර මුදල් කොල්ලකා තිබූ බව පොලිස් විමර්ශනවලදී අනාවරණය වී ඇත.
