එම ගුවන් අනතුරේ අවසන් විනාඩි එක හමාරක පමණ කාලය එම යානය තුළ සිටි ගුවන් මගියෙකු විසින් ෆේස්බුක් ඔස්සේ සජීවිව ප්‍රචාරය කර ඇති බවයි විදෙස් මාධ්‍ය වාර්තාකර ඇත්තේ.
එම මාධ්‍ය වාර්තා මගින් අදාළ වීඩියෝ පටය ප්‍රසිද්ධියට පත් කර තිබෙනවා. ගුවන් යානයක් පොළවට ආසන්නයේ පියාසර කරන ආකාරය එහි දැක්වෙන අතර මගීන් කෑ ගසන ශබ්දත් අවසන් මොහොතේ වීඩියෝගත කළ කැමරාව සෙළවී ඇද වැටෙන ආකාරයත් එම වීඩියෝවේ ඇතුළත්.
අනතුරට ලක්වූ ගුවන් යානය තුළ සිටි ඉන්දිය ජාතිකයෙකු එය වීඩියෝගත කර ඇති බවටයි ඇතැම් මාධ්‍ය වාර්තා කර තිබුණේ. කෙසේවෙතත් එය අදාළ ගුවන් යානය තුළ සිට වීඩියෝගත කරන ලද්දක්ද යන්න මෙතෙක් තහවුරු කළ නොහැකි බව ඇතැම් ඉන්දීය මාධ්‍ය වාර්තාවල දැක්වෙනවා.
අදාළ ගුවන් යානය අනතුරට ලක්වන අවස්ථාවේ පුද්ගලයින් හැත්තෑ දෙදෙනෙකු එහි ගමන් කරමින් සිටි අතර එම යානය කත්මන්ඩු නුවර සිට කිලෝ මීටර් 200 ක් පමණ දුරින් වූ පොකාරා දක්වා පියාසර කරමින් තිබුණා.
