එලෙස විවාහ වූයේ 2010 වසරේදී වන අතර එම විවාහයෙන් ඇය දරුවෙකු ප්‍රසූත කළාය.
වසර දෙකකටත් අඩු කාලයක් එම විවාහය පැවති අතර සැමියා විදේශ රැකියාවකට ගිය අතරේ 2013 වසරේදී ඇය ගම් පළාතේ පුද්ගලයෙකු සමඟ දෙවන වරටත් විවාහ වූවාය. එම විවාහයෙන් දරුවන් ප්‍රසූත නොකිරීමට ඇය වගබලා ගත්තාය.
එහෙත් එම සැමියාද ඇයගේ හිතට හරි ගියේ නැත. වසර තුනකින් එම විවාහයද කෙළවර විය.
ඇය තෙවැනි වරටත් විවාහ වූ අතර එසේ විවාහ වූයේ 2016 වසරේය. පෙර දෙවතාවක් ඇය විවාහ වී සිට ඇති බවක් ඔහු දැන ගත්තේ නැත.
තෙවන සැමියා සමඟද ඉතා කෙටි කාලයක් පමණක් සිටි ඇය වසර තුනකින් එම විවාහයද කෙළවර කරගත්තාය.
මේ අතරතුරදී දිනක් ඇය එක්තරා ආයතනයකට පැමිණි අවස්ථාවේ එහි සේවය කරන නිලධාරියෙකු හඳුනා ගත්තාය. ඇගේ රූපශ්‍රියට ඔහුගේ සිතේද ආදරයක් ඇති විය.
ඇය තමාගේ බිරිඳ කරගන්නට ඇත්නම් කොපමණ හොඳදැයි ඔහු සිතුවේය. අවසානයේ එම සිතිවිල්ල පල දැරීය.
ඒ අනුව 2021 වසරේ ඔවුන්ගේ විවාහය ලියාපදිංචි කෙරිණි.
ඒ ඇයගේ සිව්වන විවාහය බව ඔහු දැන සිටියේ නැතිමුත් සිව්වන විවාහයෙන් ඇය දරුවකු ප්‍රසූත කළාය.
ටික කලක් යනවිට ඔවුන්ගේ විවාහය දෙදරා ගියේය.
ඇය ඔහු සමග නිතර නිතර රණ්ඩු සරුවල් කර ගත් අතර ඇයගේ පෙර වැරදි රැසක්ද ඔහුගේ සවනට වැටෙන්නට විය.
ඔහු පොලිසියට පැමිණ පැමිණිල්ලක් දැම්මේය. ඔහු එලෙස පැමිණියේ ඇයගේ පෙර විවාහ සහතික තුනද සොයා ගෙනයි.
තමා පත් වූ තත්ත්වය ගැන ඔහු සැබැවින්ම කම්පාවට පත්ව සිටි අතර පොලිසිය පැවසුවේ විමර්ශනවලින් පසු බහු විවාහ චෝදනාව යටතේ ඇයට එරෙහිව ගාල්ල මහේස්ත්‍රාත් අධිකරණයේ නඩු පවරන බවය.
