ජ්‍යෙෂ්ඨ නියෝජ්‍ය පොලිස්පති රවී වෛද්‍යාලංකාර මහතාට එරෙහිව පොලිස් විශේෂ විමර්ශන ඒකකයෙන් විමර්ශනයක් පැවත්වෙන බැවින් සහ ඔහුට එරෙහිව අල්ලස් හෝ දූෂණ චෝදනා විමර්ශන කොමිෂන් සභාවෙන් වත්කම් විමර්ශනයක් පැවැත්වෙන බැවින් විනය පරීක්ෂණයකට යටත්ව විශ්‍රාම ගැන්වීමට පොලිස්පතිවරයා නිර්දේශ කර තිබුණු බව ජාතික පොලිස් කොමිෂන් සභාවේ ආරංචි මාර්ග කියයි.
පොලිස්පතිවරයා විසින් කරනු ලැබූ නිර්දේශය අනුමත කරමින් නීතිය හා සාමය අමාත්‍යංශයද විශ්‍රාම වැටුප් ව්‍යවස්ථා සංග්‍රහයේ 2 සහ 12 වගන්ති අනුව ජ්‍යෙෂ්ඨ නියෝජ්‍ය පොලිස්පතිවරයා විශ්‍රාම ගැන්වීමට නිර්දේශක තර තිබිණි.
විමර්ශනයක් ඇතැයි කී පමණින් එකඟවෙන්න බැහැ :
කෙසේ වෙතත් ජාතික පොලිස් කොමිෂන් සභාව රැස්වූ අවස්ථාවේ මේ පිළිබඳව සාකච්ඡාවට ගෙන ඇති අතර එහිදී කොමිෂන් සභා සාමාජිකයන් ප්‍රකාශ කර ඇත්තේ විමර්ශනයක් ඇතැයි කී පමණින් ඊට එකඟවීමට කොමිසමට නොහැකි බවයි.
රවී වෛද්‍යාලංකාර මහතාට එරෙහිව පොලිසියෙන් කරන විමර්ශනයේ පෙත්සම ලැබී ඇත්තේ වසර දෙකකට පමණ පෙර බවත්, ඔහු මැයි මාසයේ විශ්‍රාම ගන්නා බව දැන දැනත් එම විමර්ශනය අවසන් කර නොතිබීම ගැටලුවක් බවත් ප්‍රකාශ කර ඇති කොමිසම අදාළ ලේඛන ගෙන්වා පරීක්ෂා කර බලා ඒ ගැන තීන්දුවක් ගැනීමට තීරණය කර තිබේ.
ඒ අනුව ලබන බ්‍රහස්පතින්දා (10) ජාතික පොලිස් කොමිෂන් සභාව රැස්වූ පසු අදාළ ලේඛන පරීක්ෂා කර බලා ජ්‍යෙෂ්ඨ නියෝජ්‍ය පොලිස්පති රවී වෛද්‍යාලංකාර මහතාගේ විශ්‍රාම ගැනීම ගැන තීන්දුවක් ගැනීමට තීරණය කළ බව කොමිෂන් සභාවේ උසස් නිලධාරියෙක් පැවසීය.
විශ්‍රාම වැටුප් ව්‍යවස්ථා සංග්‍රහය:
විශ්‍රාම වැටුප් ව්‍යවස්ථා සංග්‍රහයේ 02 සහ 12 වගන්ති අනුව කියැවෙන්නේ විශ්‍රාම ගන්නා අවස්ථාවේ විනයානුකූලව කටයුතු කෙරෙන බවට සෑහීමට පත්වන විට විනය බලධාරියා විසින් විශ්‍රාම වැටුප් විෂය භාර අමාත්‍යංශ ලේකම්ගේ අනුමැතිය ලබාගෙන එම විශ්‍රාම ගැනීවීම සිදු කළ යුතු බව හා එවිට විශ්‍රාම පාරිතෝෂිකය හෝ මාසික විශ්‍රාම වැටුපක් පරීක්ෂණ අවසන් වන තෙක් ගෙවනු නොලබන බවයි.
පොලිස් මූල්‍ය අපරාධ විමර්ශන කොට්ඨාසය භාර ජ්‍යෙෂ්ඨ පොලිස් අධිකාරී ඒ රවී වෛද්‍යාලංකාර මහතා පොලිස් සේවයට එක් වී ඇත්තේ 1979 වසරේ ඔක්තෝබර 08 වැනිදාය. 2015 මාර්තු මස 18 වැනි දා ඒ මහතා ජ්‍යෙෂ්ඨ නියෝජ්‍ය පොලිස්පතිවරයකු ලෙස උසස්වීම් ලබා තිබේ.
(ලංකාදීප)
