රාජ්‍ය දෙපාර්තමේන්තුව ඉදිරිපත් කළ එම යෝජනාවට අනුව බොහෝ වීසා ඉල්ලුම්කරුවන් ෆේස්බුක් හා ට්විටර් ගිණුම් පිළිබඳ සිය ඉතිහාසය සම්බන්ධ තොරතුරු සැපයිය යුතු වනු ඇත.
ඒ අනුව ගෙවුණු පස් වසරක සිය සමාජ මාධ්‍ය අනන්‍යතාව හෙළිකිරීමට ඔවුනට සිදුවේ.
මේ යෝජනාවට අනුව වසරකට මිලියන 14.7 ක පමණ පිරිසකට මෙය බලපානු ඇතැයි කියැවේ.
අනන්‍යතාව තහවුරු කරගැනීමට:
එසේ සැපයෙන තොරතුරු, සංක්‍රමණ හා සංක්‍රමණික නොවන වීසා අපේක්ෂා කරන පුද්ගලයින් හඳුනාගැනීමට මෙන්ම දැඩි පරීක්ෂාවකට ලක්කිරීමට යොදා ගැනේ.
මීට අමතරව අදාළ ඉල්ලුම්කරුවන්, ගෙවුණු වසර පහ තුළ තමන් පරිහරණය කරන ලද දුරකථන අංක, ඊමේල් ලිපින මෙන්ම සංචරණ පිළිබඳ තොරතුරු ද සැපයිය යුතු වනු ඇත.
කිසියම් රටකින් කෙදිනක හෝ පිටුවහල් කර ඇතිදැයි යන්න ද සඳහන් කළ යුතු අතර, එසේ නැතිනම් සිය කවර හෝ ඥාතියකු ත්‍රස්තවාදී කටයුතුවලට සම්බන්ධවී ඇති දැයි යන්න ද සඳහන් කළ යුතු වනු ඇත.
වසරකට මිලියන 14.7 ක පමණ පිරිසකට මෙය බලපානු ඇතැයි කියැවේ.
වීසා බලපත් තොරව සිය රටේ සංචාරය කිරීම සඳහා ඇමෙරිකාව විසින් ප්‍රතිපාදන සලසනු ලැබ ඇති රටවල් අතරට ගැනෙන එක්සත් රාජධානිය, කැනඩාව, ප්‍රංශය හා ජර්මනිය වැනි රටවල පුරවැසියන්ට මෙම යෝජනාවෙන් බලපෑමක් එල්ල නොවනු ඇත.
කෙසේවෙතත්, ඉන්දියාව, චීනය හා මෙක්සිකෝ වැනි රටවල පුරවැසියන් රැකියා හෝ නිවාඩු සඳහා පැමිණෙන්නේ වුවද ඔවුන් මීට ඇතුළත් විය හැක.
යෝජනාව ක්‍රියාවට නැගීම ?
පසුගිය මැයි මාසයේදී මේ සම්බන්ධයෙන් යම් නීති ගෙන එද්දී එවක රාජ්‍ය දෙපාර්තමේන්තුව නිකුත් කළ නිල නිවේදනයක කියවුණු පරිදි, පුද්ගලයින්ගේ සමාජ මාධ්‍ය භාවිතය පිළිබඳ තොරතුරු ලබාගන්නා ලෙස නිලධාරීන් දැනුවත් කෙරුණේ, "අනන්‍යතාව තහවුරු කරගැනීමට හෝ ජාතික ආරක්ෂාව සම්බන්ධයෙන් තවදුරටත් තදබල ලෙස සුපරීක්ෂණයක් කිරීම සඳහා එම තොරතුරු අවශ්‍ය වන්නේ යැයි" හැඟෙන්නේ නම් පමණි.
ත්‍රස්තවාදයට එරෙහිව සටන් කිරීම සඳහා යැයි පවසමින්, එක්සත් ජනපදයට ඇතුළුවන විදේශිකයින් සඳහා "අතිශය දැඩි සුපරීක්ෂණයක්" ක්‍රියාත්මක කිරීමට ජනාධිපති ට්‍රම්ප් දුන් පොරොන්දුවෙන් පසු මේ වඩාත් දැඩි යෝජනාව ඉදිරිපත් විණි.
මෙම යෝජනාවට කළමනාකරණ හා අයවැය පිළිබඳ කාර්යාලයේ අනුමැතිය ලැබිය යුතුව වේ.
ඒ පිළිබඳ තීරණයක් ගැනීමට පෙර යෝජනාව සම්බන්ධයෙන් අදහස් පළකිරීම සඳහා මහජනයාට මාස දෙකක කාලයක් ඉඩ දෙනු ඇත.
භාෂණයේ නිදහසට ඇතිවන බලපෑම කුමක්ද?
මෙම ප්‍රතිපත්තිය හෙලාදකින සිවිල් නිදහස පිළිබඳ කණ්ඩායම් පෙන්වා දෙන්නේ මෙය භාෂණයේ නිදහසට හානි කළ හැකි ආකාරයේ පුද්ගලිකත්වය ආක්‍රමණය කිරීමක් ලෙසිනි.
"තමන් අන්තර්ජාලයේ පළකරන දේවල් ආණ්ඩුවේ නිලධාරීන් වරදවා වටහා ගනීවිදැයි යන්න ගැන මිනිසුන්ට දැන් හිතන්නට වේවි" යැයි ඇමෙරිකානු සිවිල් නිදහස් සංගමයේ හිනා ශම්සි පැවසුවාය.
"ට්‍රම්ප් පරිපාලනය 'ත්‍රස්තවාදී ක්‍රියාකාරකම්' යන අපැහැදිලි හා වැඩිපුර භාවිත කරන යෙදුමෙන් අර්ථගන්වන්නේ කුමක්ද යන්න ගැනත් අප අවධානය යොමු කර තිබෙනවා. මොකද කීවොත්, මූලික වශයෙන් එය දේශපාලනකිකයි. ඒ නිසා කිසිම වරදක් නොකළ ආගමනිකයින්ට වෙනස්කොට සැලකීම සඳහා එය යොදා ගන්නට ඉඩ තිබෙනවා " යැයි ද ඇය සඳහන් කළාය.
චීනයේ Sina Weibo සහ රුසියාවේ වීකේ VK
යෝජනාවලින් ආවරණය කෙරෙන සමාජ මාධ්‍ය ජාල අතරට ඇමෙරිකාව මූලික කරගත් ඉන්ස්ටග්‍රෑම්, ලින්ක්ඩ්ඉන්, රෙඩිට් හා යූටියුබ් ද අයත්වේ.
කෙසේවෙතත්, චීනයේ සීනා වෙයිබෝ (Sina Weibo) සහ රුසියාවේ වීකේ (VK) වැනි සමාජ මාධ්‍ය ජාල ද ඊට ඇතුළත් කෙරෙනු ඇති බව නිව්යෝර්ක් ටයිම්ස් පුවත්පත් වාර්තාවක දැක්විණි.
(බීබීසී සිංහල සේවය)
